AFRINPOST-Taybet
Nûçegihanê Afrinpostê roja Çarşemê ragihand ku rêyên di navbera bajarê Efrînê û navçeyên wê û Efrîn-Ezazê de ji ber pevçûnên ku di navbera niştedagîran(eşîra Miwalî) û milîsên ”Cebha Şamiyê” û hevalbendên wê yên bi navê ”Xurfeya Qiyade Miwehed-Ezim” de qut bûn.
Nûçegihan diyar kir ku rêya Efrîn-Ezaz û Ezaz-Kefercenê ya ber bi navçeya Şera û Bilbilê de diçe qut bû û derbarê ziyanên mirovî yên pevçûnan de ti agahî nehatin bidestxistin.
Li bajarê Efrînê yê dagirkirî tansiyon heye û bi taybet li herêma çerxerêya ”Newroz” lê zêde her demekê dengê guleyan tê bihîstin.
Her wiha li dorhêla bajarê Ezazê û bajarokê Exterîn û Şimarîn jî pevçûn rûdan ku di encamê de (10) çekdarên eşîreya ”Miwalî” hatin dîlgirtin.
Milîsên polîsên dagirkeriya Tirkî duh roja Sêşemê, (2) jin bi tawana ku nasnameyên sexte û girêdana bi Daiş’ê re bin çav kirin. Ji ber vê yekê lawên eşîreyê yên li wan herêman belav in, gefa li milîsan xwarin ku eger bernedin wê şer derkeve.
