AFRINPOST-Taybet
Têkildarî teqîna herêma Sînaha ya bajarê Efrîna dagirkirî ku 30`ê Çileya 2021 rûda, desthilatên dagirkeriya Trikî roja Duşemê, 4 niştedagîrbin çav kirin.
Di vê derbarê de nûçegihanê Afrinpostê li bajarê Efrînê ragihand ku hêzên dagirkeriya Tirkî 4 kes ku 2 ji wan ji bajarê Ezazê, yek ji Idlibê û yê din jî ji Hemayê ye, bin çav kir.
Roja Çarşemê li dorhêla sûka Çarşemê ya herêma pîşesaziyê(Sînaha), kamyoneke bombebarkirî teqiya ku di encamê de 6 kes hatin kuştin û 29 jî birîndar bûn.
Di wê teqînê de hejmareke şêniyên Efrînê şehîd bûn. Nûçegihanê Afrinpostê navên wan belge kirin ku ew jî ev in; Ebdulrehman Elî û kurê wî Elî Ebdilrehman ji gundê Bozîkê yê Cindirêsê û Elî Hemdan ji eşîreya Umêrat. Her wiha navên birîndaran jî ev in; Cîhad Mûsa(gundê Cilbirê), Rêber Mûsa(gundê Cilbirê), Ebid El-Qadir Osman 38 salî, Hesen Mamo 46 salî ji Qirigolê û Hisên Şêx Mihemed ji bajarê Efrînê.
Teqîn piştî çend rojan fermana desthilatên dagirkeriya Tirkî ji milîsên “Cebha El-Şamiyê” ku rêveberiya herêma pîşesaziyê radestî meclisa xwecihî bikin, rûda.
Li gorî nûçegihanê Afrinpostê milîsên “El-Şamiyê” ji sê salan ve ew herêmê bi rêve dibir ku bac li ser xwediyên werşeyan disepandin ku 50 L.Tirkî mehane li serr her werşeyekê bi bihaneya dabînkirina parastina dikanên pîşesaziyê disepand.
